Desenvolvimento
Prezidenti da Republika (PR) Taur Matan Ruak husu ba Primeiru Ministru (PM) Kay Rala xanana Gusmao atu labele hamaus demais ho kontrator sira. “PR Taur husu PM Xanana labele halimar demais ho kontrator sira, tenke penaliza kontraktor sira ne’ebe halo obra laiha kualidade,” hateten PR Taur hodi hatan komunidade Aubeon nia lamentasaun.
Tanba uma sira husi Programa Millenium Development Goal’s (MDG’s) ne’ebe mak Governu entrega ona ba povu sira maibe seidauk kumpletu, PR Taur haktuir dehan governu iha abitu ida halo projeitu halo rohan husik hela rohan.
Iha oportunidade ida ne’e, PR Taur mos husu ba kompania BTK atu halo hotu tiha uma MDG’s hodi nune’e labele halo sorin husik hela sorin. “Tanba gasta osan be’e ba buat ne’ebe iha kualidade, karik gasta osan ba buat ne’ebe mak laiha kualdiade, ne’e hanesan buat ida karik gasta ou estraga deit povu nia osan,” dehan PR Taur.
Nia hatutan, ba sira ne’ebe mak jere nasaun nia osan, kuandu ladiak tenke responsabliza tanba laiha ema ida mak iha lei nia leten , maibe hotu-hotu hakruk ba lei.
Tanba antes ne’e, hanesan projeitu konstrusaun Comisaun nasional Eleisaun (CNE) neebe mak kaer husi kompania ATRAMOR no ikus mai osan mohu konstrusaun seidauk remata, maibe, PM Xanana tolera no fo nafatin tempu hodi husu atu finalija tiha konstrusaun ne’e, tuir planu, Governu mos sei aumenta osan ba kompania ATRAMOR ne’e hodi finaliza konstrusaun ho halais.
Prezidenti da Republika (PR) Taur Matan Ruak husu ba Governu liu husi Ministeriu Agrikultura no Peskas (MAP), Mariano Asanami sabino, no Ministru Obras Publiku (MOP), Gastao Souza, atu tau atensaun ba Mota Bebui tanba to’o fulan ida ona mota no irigasaun Bebui seidauk rezolvidu.
Liu husi komunikadu ne’ebe maka Jornal nacional Diario aksesu iha Kinta (25/7), katak xefi estadu promete ona ba komunidade ne’ebe sai vitima ba mota bebui atu fo hatene ba MAP no MOP atu bele hadia hikas mota refere, nune’e bee ne’ebe sulin tuir Mota bebui bele la’o tuir nia dalan, tanba to’o oras ne’e irigasaun refere nakonu ho rai henek nune’e bele la bele halai tuir ba natar.
“Prezidenti sei fo hatene ba MAP para haruka eskaptor hodi dudu sees tiha rai henek, Kona ba Bronzon Ministru Obras Publiku maka hatene, tanba ne’e Prezidente sei fo hatene mos ba MOP atu tau atensaun ba problema ne’e,” promete PR Taur.
Xefi Estadu hateten lia hirak ne’e, wainhira hala’o vizita de trabalho hod observa diretamente ba komunidade Bebui hamutuk uma kain 25 ne’ebe mak afetadu inundasaun husi mota Bebui, Suku afloikai, Sub Distritu Watulari, Distritu Viqueque. Xefi Estadu mos promete ba komunidade iha bebui wainhira komunidade ejiji, xefe estadu sei fo hatene ba parte kompotente hodi rejolve.
Aliende ne’e, komunidade mos ejiji ba Prezidenti Republika atu bele fo hatene mos ba Ministeriu kompetente para aumenta tan Bronzo ne’ebe satan Mota bebui, tanba Bronzo ne’ebe mak iha metru rua deit, nune’e mota boot hakat liu bronzo ne’e hodi hetan inundasaun ba komunidade bebui.
Aproveita oportunidade ne’e, Prezidenti Taur matan Ruak observa mos Ponte Ira-Bere ne’ebe liga ba sub Distritu Watu-Carbau, Distritu Viqueque no Sub Distritu Iliomar, Distritu lautem, ne’ebe mak kotuk kuaze metru atus lima.
Tuir ajenda xefe Estadu ho nia komitiva sei deskansa iha Sub Distritu Baguia, Distritu Baucau, nune’e Xefe Estadu Kontinua halao nia vizita ba komunidade ne’ebe maka afeita inundasaun iha Suku Seical, Sub Distritu laga, Distritu Baucau.